2011年8月23日星期二

升都唔信

http://www.headlinefinance.hk/specialist_investment_column.php?contid=159075&person=4
2011年08月24日
  整個外圍股市有反彈跡象,歐洲股市和美股期貨上升;內地製造業有回穩跡象,央票拍賣利率持平,紓緩市場對人民銀行加息的疑慮,內地A股結束6日跌勢,上證綜指反彈,升1.5%。港股跟外圍向上,恒指朝早回一回後就步步高升,從低位上番近500點,收市升389點至19876點,升近2%;國企指數前日跌得勁昨亦彈得多,大漲333點至10579點,升幅3.3%。但中港兩地大市成交唔係好配合,本地全日成交縮減至745億元。

  近收市時搵中環茶友傾傾,呢個茶友為個相當大的投資組合揸盤,但昨仍然無厘神氣,話大市無厘火氣,昨日下晝歐洲主要股市升2%,美股杜指期貨升170點亦有1.6%,按道理港股跌咗咁多,呢種環境升番500點都唔係好出奇,但結果只升得300幾點,睇成交唔夠多,市場買意未夠強。

  沽風過後彈得多

  茶友話自己試過幾次見到歐洲好就去追,以為大市已見底轉勢,點知港股收市後歐洲股愈升愈少,到美股更加唔掂,中咗幾次招後,佢見歐洲股市大升都有少少麻木,唔敢過度興奮,升都唔信,有時都係朝早買下晝沽,賺少少就走,唔敢過夜(吓?芬佬都做即日鮮?)。

  茶友話見唔少芬佬朋友(即基金經理)近排焗住沽貨,因為個市愈跌愈急時,芬佬被逼要跟手減倉應付贖回,而且有唔少對沖基金蝕咗好多,個別基金有蝕水三、四成就自動解散的條款,所以部份基金被逼狂沽套現,多數用市價盤不問價沽,所以前日有啲基金愛股都插到幾瘋狂。

  沽得癲,彈得多。近兩日被狂質的水泥股、建材股、濠賭股及金飾股昨全線反彈。安徽海螺(914) 、中建材(3323) 、永利澳門(1128) 、美高梅中國(2282) 都反彈超過半成。周生生(116) 彈5%,六福(590) 急彈近一成!好友成功反撲,股東笑開懷,要記住狂質股反彈可能如彈波一樣,但彈完第一下後反彈力會一步步減弱。

  買咗比亞迪(1211) 的,仍然喊得一句句,佢出完業績後股價逆市勁插逾14%至28個月新低,係昨日表現第三差的股票。比亞迪受當局取消優惠政策令汽車銷量大減,以及毛利率急降拖累,中期純利按年勁跌近89%至2.75億元,期內營業額亦跌11%,大幅低於市場預期。

  比亞迪低處未算低

  由於市場競爭加劇,管理層對下半年銷情仍不樂觀,預計今年首9個月純利按年跌85%至95%。當被問及公司汽車會否減價促銷時,董事長王傳福表示,7至8月為汽車銷售淡季,但9月開始為旺季,故產品不會減價,加上有新產品推出,料價格會穩定,他認為下半年或明年業績改善時,股價會有成長。

  外界就無王傳福睇得咁樂觀,內地中低價車銷售放緩,電動車又完全未成氣候,比亞迪業績大倒退,毛利率下跌,銷售弱勢恐怕短期未能扭轉。比亞迪好明顯出現食咗「股神類固醇」的後遺症,當年股神巴菲特入股,股價升不停,搞到管理層雄心萬丈,但當亢奮一過,就發覺財力透支,非常惡頂。呢啲市強勢股都要插,弱勢股更是「低處未算低」。

  陸羽仁